ਕੈਪੀਟਲ ਗੇਨ ਟੈਕਸ ‘ਤੇ ਰਾਜਨੀਤਿਕ ਗਰਮੀ — ਪ੍ਰਧਾਨ ਮੰਤਰੀ ਨੇ ਕ੍ਰਿਸ ਹਿਪਕਿਨਜ਼ ਨੂੰ ਦਿੱਤਾ ਜਵਾਬ !

ਪ੍ਰਧਾਨ ਮੰਤਰੀ ਕ੍ਰਿਸਟੋਫਰ ਲਕਸਨ ਨੇ ਲੇਬਰ ਆਗੂ ਕ੍ਰਿਸ ਹਿਪਕਿਨਜ਼ ਦੇ ਬਿਆਨਾਂ ‘ਤੇ ਤੀਖਾ ਜਵਾਬ ਦਿੱਤਾ ਹੈ, ਜਿਨ੍ਹਾਂ ਨੇ ਉਨ੍ਹਾਂ ‘ਤੇ ਘਰਾਂ ਦੀ ਖਰੀਦ-ਫਰੋਖ਼ਤ ਤੋਂ ਟੈਕਸ-ਮੁਕਤ ਲਾਭ ਕਮਾਉਣ ਦਾ ਦੋਸ਼ ਲਗਾਇਆ ਸੀ।
ਹਿਪਕਿਨਜ਼ ਨੇ ਕਿਹਾ ਸੀ ਕਿ ਲਕਸਨ ਨੇ ਇੱਕ ਸਾਲ ‘ਚ ਚਾਰ ਜਾਇਦਾਦਾਂ ਵੇਚ ਕੇ $600,000 ਤੋਂ ਵੱਧ ਮੁਨਾਫ਼ਾ ਕਮਾਇਆ, ਜਿਸ ‘ਤੇ ਕੋਈ ਟੈਕਸ ਨਹੀਂ ਦਿੱਤਾ ਗਿਆ। ਉਨ੍ਹਾਂ ਸਵਾਲ ਕੀਤਾ ਕਿ ਆਮ ਲੋਕ ਆਪਣੀ ਕਮਾਈ ‘ਤੇ ਟੈਕਸ ਭਰਦੇ ਹਨ ਤਾਂ ਪ੍ਰਧਾਨ ਮੰਤਰੀ ਨੂੰ ਛੂਟ ਕਿਉਂ?
ਲੇਬਰ ਪਾਰਟੀ ਨੇ ਹਾਲ ਹੀ ‘ਚ ਕੈਪੀਟਲ ਗੇਨ ਟੈਕਸ ਲਾਗੂ ਕਰਨ ਦਾ ਵਾਅਦਾ ਕੀਤਾ ਹੈ — ਪਰਿਵਾਰਕ ਘਰ ਅਤੇ ਖੇਤਾਂ ਤੋਂ ਇਲਾਵਾ, 28% ਦਰ ਨਾਲ 2027 ਤੋਂ।
ਲਕਸਨ, ਜੋ ਇਸ ਵੇਲੇ ਦੱਖਣੀ ਕੋਰੀਆ ਦੇ ਏਸਿਅਨ ਸਮਿੱਟ ‘ਚ ਹਨ, ਨੇ ਕਿਹਾ ਕਿ ਹਿਪਕਿਨਜ਼ ਦੇ ਬਿਆਨ ਸਿਰਫ਼ ਰਾਜਨੀਤਿਕ ਧਿਆਨ ਭਟਕਾਉਣ ਦੀ ਕੋਸ਼ਿਸ਼ ਹਨ।
ਉਨ੍ਹਾਂ ਕਿਹਾ, “ਇਹ ਮਾਮਲਾ ਮੇਰੇ ਬਾਰੇ ਨਹੀਂ, ਸਗੋਂ ਉਹਨਾਂ ਨਿਊਜ਼ੀਲੈਂਡਰਾਂ ਬਾਰੇ ਹੈ ਜਿਨ੍ਹਾਂ ਕੋਲ ਕਿਰਾਏ ਵਾਲੀ ਜਾਇਦਾਦ ਜਾਂ ਕਾਰੋਬਾਰੀ ਥਾਂ ਹੈ — ਜਿਨ੍ਹਾਂ ‘ਤੇ ਹੁਣ ਨਵਾਂ ਟੈਕਸ ਲੱਗੇਗਾ।”
ਦੂਜੇ ਪਾਸੇ, ਹਿਪਕਿਨਜ਼ ਨੇ ਕਿਹਾ ਕਿ ਉਹ ਲਕਸਨ ਨਾਲ ਉਨ੍ਹਾਂ ਦੇ ਨਿੱਜੀ ਆਰਥਿਕ ਮਾਮਲਿਆਂ ‘ਤੇ ਖੁੱਲ੍ਹਾ ਵਾਦ-ਵਿਵਾਦ ਕਰਨ ਲਈ ਤਿਆਰ ਹਨ: “ਉਸਨੇ ਚਾਰ ਘਰ ਵੇਚ ਕੇ ਟੈਕਸ-ਮੁਕਤ ਤੌਰ ‘ਤੇ ਪ੍ਰਧਾਨ ਮੰਤਰੀ ਦੀ ਤਨਖਾਹ ਤੋਂ ਵੀ ਵੱਧ ਕਮਾਈ ਕੀਤੀ।”