ਆਕਲੈਂਡ ਵਾਲਿਓ ਧਿਆਨ ਦੇਕੇ, ਜੇ ਤੁਹਾਡਾ ਚਲਾਣ ਇਸ ਸਪੀਡ ਕੈਮਰੇ ਤੋਂ ਹੋਇਆ ਸੀ ਤਾਂ ਤੁਹਾਨੂੰ ਮਿਲੇਗਾ ਰਿਫੰਡ

ਆਕਲੈਂਡ ਦੇ ਸਟੇਟ ਹਾਈਵੇ ’ਤੇ ਟਰੈਫਿਕ ਕੈਮਰਾ ਗਲਤ ਥਾਂ ਤੇ ਲਾਇਆ ਜਾਣ ਕਾਰਨ, ਹੁਣ ਆਕਲੈਂਡ ਪੁਲਿਸ ਨੂੰ ਲਗਭਗ $50,000 ਦੇ ਜੁਰਮਾਨੇ ਆਕਲੈਂਡ ਵਾਸੀਆਂ ਨੂੰ ਵਾਪਸ ਕਰਨੇ ਪੈਣਗੇ। ਕੁਮੇਉ ਇਲਾਕੇ ਵਿੱਚ 650 ਡਰਾਈਵਰਾਂ ਨੂੰ ਇਹ ਜੁਰਮਾਨੇ ਜਾਰੀ ਕੀਤੇ ਗਏ ਸਨ, ਇੱਕ ਡਰਾਈਵਰ ਦੇ ਸੁਆਲ ਚੁੱਕੇ ਜਾਣ ਤੋਂ ਬਾਅਦ ਕਿ ਕੈਮਰੇ ਵਾਲੇ ਇਲਾਕੇ ਵਿੱਚ ਆਉਂਦੇ ਹੋਏ ਅਚਾਨਕ 80ਕਿਲੋਮੀਟਰ ਤੋਂ 50 ਕਿਲੋਮੀਟਰ ਦੀ ਰਫਤਾਰ ਕਰਨਾ ਸੰਭਾਵਿਤ ਨਹੀਂ, ਨੂੰ ਆਕਲੈਂਡ ਪੁਲਿਸ ਨੇ ਵੀ ਸਮੀਖਿਆ ਤੋਂ ਬਾਅਦ ਮੰਨਿਆ ਤੇ ਮੁਆਫੀ ਮੰਗਦਿਆਂ ਜੁਰਮਾਨੇ ਵਾਪਸੀ ਦੀ ਗੱਲ ਆਖੀ।
ਰੋਡ ਪੋਲੀਸਿੰਗ ਡਾਇਰੈਕਟਰ ਸੂਪਰਿੰਟੇਡੈਂਟ ਸਟੀਵ ਗ੍ਰੀਲੀ ਨੇ ਇਸ ਬਾਰੇ ਮੰਨਿਆ ਹੈ ਕਿ ਕਿ SH 16 ‘ਤੇ ਮੋਬਾਈਲ ਕੈਮਰੇ ਦੀ ਸਥਿਤੀ “ਮੌਜੂਦਾ ਪੁਲਿਸ ਨੀਤੀਆਂ ਅਨੁਸਾਰ ਠੀਕ ਨਹੀਂ ਸੀ ਕਿਉਂਕਿ ਇਹ ਥਾਂ ਉਸ ਬਿੰਦੂ ਤੋਂ 200 ਮੀਟਰ ਤੋਂ ਘੱਟ ਸੀ ਜਿੱਥੇ ਗਤੀ ਸੀਮਾ ਘਟਦੀ ਹੈ।”
ਜਨਵਰੀ 2024 ਤੋਂ ਅਪ੍ਰੈਲ 2025 ਤੱਕ Old Railway Road ਤੇ John Macdonald Lane ਵਿਚਾਲੇ 650 ਜੁਰਮਾਨੇ ਜਾਰੀ ਹੋਏ ਸਨ।
ਕਾਨੂੰਨ ਦੇ ਅਨੁਸਾਰ, ਡਰਾਈਵਰਾਂ ਨੂੰ ਗਤੀ ਸੀਮਾ ਦੇ ਨਿਸ਼ਾਨ ਤੋਂ ਪਹਿਲਾਂ ਹੀ ਆਪਣੀ ਰਫ਼ਤਾਰ ਘਟਾਉਣੀ ਚਾਹੀਦੀ ਹੈ। ਪੁਲਿਸ ਨਿਯਮਾਂ ਅਨੁਸਾਰ, ਮੋਬਾਈਲ ਕੈਮਰੇ ਉਸ ਥਾਂ ਤੋਂ ਘੱਟੋ ਘੱਟ 200 ਮੀਟਰ ਦੂਰ ਹੋਣੇ ਚਾਹੀਦੇ ਹਨ, ਜਾਂ 100 ਮੀਟਰ ਜੇਕਰ ਕੋਈ ਅਗਾਹੀ ਨਿਸ਼ਾਨ ਮੌਜੂਦ ਹੋਵੇ। ਇਸ ਮਾਮਲੇ ‘ਚ ਕੈਮਰਾ ਸਿਰਫ 178 ਮੀਟਰ ਦੂਰ ਸੀ, ਜੋ ਨਿਯਮਾਂ ਦੀ ਉਲੰਘਣਾ ਹੈ।